may bahid lungkot sa iyong mga mata mga ngiting pinawi na ata sa mukha
pisnging daluyan ng nag-uunahang luha
halimaw na lungkot ang doo'y nagsasaya.
ano nga at hinahayaan mong kapanglawa'y maghari
sa lupain ng hilahil ay iyong papanahanin
patang kaluluwa mo sa mga isipin
di na ata makatayo di na rin makaidlip.
alam kong alam mo kung saan ako hahanapin
kung ang dalahin mo'y kay bigat na tiisin
sa iyong paglalakbay tila nais ng tumigil
agad mo akong tawagin,ako'y agad darating.
ang aking lira'y luma't sira na
ngunit kung kailangan ito'y tutugtog ng may halina
pang-aliw sa mga alipin nitong dusa
musikang magduduyan sa matamis na gunita.
kung ang pag-asa'y gahiblang mapupugto
ang lumbay sa puso'y tuloy sa paglago
hayaan mo't ang liwang ay ihihiling ko
sa lilim nito'y sumilong ka,kapayapaa'y matatamo.
No comments:
Post a Comment