DALINSIL

Kay lambing ng hangin ng umaga ngayon

kay tamis ng awit niyaong mga ibon

ang araw sa langit may bating mairog

banaag sa kanyang liwanag na handog



kung nunuynuyin ko ang nagdaang mga araw

ng aking tinutugpa'y kawalang kawawaan

daang maluwang sa mga ganid at mangmang

subalit ang huli'y sawing katapusan



hibang ako noon tuloy sa paghakbang

kasamaa'y aking aliw sa katawan

di ko nga napansing ang panlulupaypay

aking kaluluwa'y aking pinapatay



paunti nang aking nalusong ang paa

ng mapaghulo ko itong mga nagawa

ang kasasapita'y mga pasakit pala

mapapala ko'y sa bangungot kamukha



sa aba kong lagay ikaw ay naglahad

kamay mong anyaya ay tulong at gabay

inakay ako sa matuwid na daang

masikip ngunit may mapayapang buhay



pa'no lilimutin iyong mga ginawa

pagsisikap mo sa aking kaluluwa

mahango ito sa pita ng masama

at ligayang tunay ay aking matamasa



purihin ang diyos at ngayo'y sumapit

iyong kaarawang tinakda ng langit

marahil nga upang tulad ko'y hanguin

sa pagkawakawak iba pang dalinsil.